Vormoos feiert
(Romana Pieringer)

Ja z'Vormoos is halt oiwei was los,
heit feiern ma unsa Glocknhaus groß,
wann unserne Glockn läutn, dös is wunderboa,
da kimmts Oan fast als wia im Himmi voa.

Es is fest gspend und zaumgholfn wordn,
drum machts a an Herrn Pfarrer wenig Sorgn,
denn z'Vormoos, da geht wirklich was zaum,
wei ma gschickte Leit und guate Arbeiter ham.

Wannst wem brauchst, hat Jeder dawei,
iss für Kircha, helfn Oissanda glei,
aba oan Chef braucht ma do, dös is kloa,
guat dass da Daxegger Hans zur Stell woa.

Drum geht's aufwärts Schritt für Schritt,
er begeistert uns Alle und reißt jeden mit,
und heit derf ma Feiern und uns recht gfrein,
denn so a schens Kirchal wird net leicht wo sein.

In Vormoos is oiß lebendig und nixi steif,
unsa Glocknhaus is direkt "museumsreif",
schauts in Kircha und as Glockenhaus ein,
dann werds genau so wia ich begeistert sein.

A dö letzn Kriagstag hams unserne Glockn nu fort,
zum Einschmelzn für Kanonen, in an fremdn Ort,
drei poa Rösser hams schier net dazogn,
dös is fein koa Märchen und net dalogn.

Nachn Kriag kemmans oise Ganze wieder zruck,
dös war für Vormoos a richtig groß Glück,
oan poar Rösser wird's Hoamziagn net z'vie,
gwiß hat da da Herrgott sein Hand im Spie.

Unsa himmlischer Vata der hats aso wolln,
denn dö schen altn Glock dö solln,
in da Vormooser Filiale laut erklinga,
alle Leit zum Bittn und Betn bringa.

Ja zum Danks hama so vü Grund,
a für heit für dö sche Stund,
wei da Herrgott oiß zum Guatn wend,
unser Leben liegt ja a seine Händ,
er helft uns a jeds Load zum Tragn,
vergeß ma nia aufs "Danksche" sagn!